My Experience The Face Shop

السلام عليكم ورحمة الله وبركاته 

.

.

.

اليوم مثل ما أنتو شايفين راح اتكلم عن تجربتي لماسكات "ذا فيس شوب" 

بالبدايه كلنا عارفين ان الماسكات ماتشيل الحبوب والاثار من الاخر ! كثير يقولون حنا نحط ماسكات بس ماتروح حبوبنا والخ لكن معروف ان الماسكات ماتسوي كل هذا ماراح اتكلم عن البشره الا بعدين 

شريت ماسك الرمان وماسك الأرز بأخر الموضوع راح اكتب اسعارهم 

-

تجربتي والنتيجه:

ماسكاتهم جداً جميله امس جربت واحد صدق يخلي البشره طريه من قلب وناعمه زي بشرة الاطفال وغير كذا هذا اعطت بشرتي شوي لمعه يعني اذا من استخدام واحد صارت بشرتي كذا اذا استمريت وش راح يصير؟ كثير منتجات نستخدمها مره وحده ولا نعيدها لأنها مافادتنا ولا ضرتنا تخسرين 20 ريال على الفاضي لكن هذا استعمال واحد وشهادتي فيه مجروحه جميل وانصح للي بشرتهم باهته ومافيها لمعان يستخدمه طبعاً ازين شي الماسك تحطينه اذا بتروحين مناسبه زواج ... الخ لكن مايمنع انك اذا صرتي فاضيه بالبيت ماتحطينه بالعكس داومي على الماسكات وتشوفين نتيجه مرضيه 

بالنسبه للأسعار كثير حبيتها واللي على جمب هذا مو ماسك هذي لصقات الأنف للرؤس السوداء للأمانه للحين ماجربتها بس حقة المحل قالت ان هذي اكثر شي ينباع عندنا يعني اكيد جميلات ويستحقون تعيدون التجربه ان شاءالله 

الأسعار:

سعر ماسك الرمان : 25 ريال 

سعر ماسك الأرز : 12 ريال 

سعر لصقات الأنف : 20 ريال

ان شاءالله بجرب صنفرتهم وكريماتهم وبقولكم رأيي فيهم من وجهة نظري هالمحل هذا ينعاد مره ثانيه وبجداره ويستاهل انك تضيعين فلوسك عليه اتمنى استفدتوا من الموضوع وشكراً لكم

simple Makeup in the morning !

السلام عليكم 

.

.

.

بما إنها أول تدوينه حبيت اخليها بسيطه تتكلم عن الميك اب بالدوام او الصباح طبعاً اعتذر عن التصوير الشنيع بس لأن كامي خربانه اضطريت اصور بكام جوالي ان شاءالله البوستات الجايه أجمل .

طبعاً كلنا عارفين اننا لازم بالصباح نحط سيمبل ميك اب مايكون اوفر واي شادو وارواج غامقه وصارخه او مات الخ... 

اليوم حابه اتكلم عن الميك اب اللي استخدمه بالبدايه انا ماحب احط فاونديشن لانه يتفاعل مع الشمس ويطلع حبوب ويعدم بشرتي بلاش فاونديشن ف إستبدلته ب بيبي كريم غارنيه يوحد اللون ويغذي البشره بس ما احطه كل يوم تقريباً متى ما أكون فاضيه حطيته لأنه شوي يطلع زيت ببشرتي ويخليها دهنيه عاد انا بشرتي دهنيه خلقه ف مو دايم استخدمه ثاني حاطه البلاشر استخدم بلاشر ذا بالم مايحتاج امدحه لأن منتجاته معروفه وشهادتي فيهم مجروحه صراحه انا افضل البلاشرات الورديه شوي عشان تخليني بيبي فيس مو حلو لما تحطين تان وبلاشر برتقالي الصباح كذا يكون شكلك كأنك بزواج مو ميك اب صباحي . 

ثالث حاجه الايلانر والكحل الابيض اللي هو XXL طبعاً انا عيوني صغيره ف أحط كحل ابيض او فضي ماتفرق وايلانر ريميل.

رابع حاجه الارواج ما احب الارواج الغامه ابداً واساسا مو حلوه صباحياً استخدم قلوس مات او تنت شفايف او لابيلو بس اوقات لما اكون متفرغه احط روج وردي بالصوره طالع فاقع بس بالطبيعه جدا حلو واحط فوقه مرطب خفيف .

خامس حاجه الحواجب ماحب ارسمها ابداً لان انا حواجبي كثيفه شوي ف أشقرها واستخدم ماسكارا للحواجب يعطيها مظهر طبيعي اكثر .

سادس حاجه والآخيره اللي هو قلتر برجوا أحطه عند مثلث العين من قدام بالفرشه بس عشان يوسع العين .

بالنهايه انا مو دايم استخدم القلتر والكحل الابيض اهم حاجه هي الايلاينر والحواجب الشفايف والبيبي كريم . 

ماحب استخدم ماسكرا دايم لأنو اذا استخدمتها يومياً تطيح رموشي وغير هذا انا ألبس نظاره غالباً ف مايوضح بس اهم شي اخلي عيني تتوسع 

....

" المنتجات وأسعارها "

ماسكارا الحواجب من Elf طالبتها من الانستقرام ب 30 ريال 

بلاشر The Palm من الانستقرام برضو ب 120 ريال لون بيبي بينك 

الفاونديشن BB cream من غارنيه متوفر بالسوبر ماركت أو بالصيدليات ب 30 ريال 

قلتر برجوا من محلات الميك اب او صيدلية وايتس ب 90 ريال 

مرطب May blline من صيدليات التجميل ب 25 ريال 

روج بيبي بينك من ويت أند وايلد طالبته من الانستقرام ب 29 

الكحل الابيض من H&M ب 20 ريال 

-

أتمنى أفدتكم بالبوست هذا وأن شاءالله دعمكم وتشجيعكم لي يخليني استمر وشكراً لكم 

My First Post

السلام عليكم 

.

.

.

بداية أنا ريم مهتمه بالفاشن ، الميك اب ، المناكير ، الروتين .

يعني بإختصار البلوق حقي راح يتكلم عن تجاربي الشخصيه واشياء تم تجربتها على اشخاص اعرفهم راح اعرض لكم منتجات حبيتها سلبياتها وايجابياتها وتقييمي لها وهل انصحكم فيها وانصحكم انكم تشترونها  ، انا مو اخصائيه او عندي شهاده او من هالقبيل انا بس حبيت اعرض لكم تجاربي وهالشي فادني او ضرني كثير قالوا افتحي مدونه وحطي تجاربك وبما اني انسانه عاشقه لاهتمام البشره والشعر حبيت اتكلم عن اللي اجربهم فقط واي شي اعرضه اكون انا مجربته وطبعاً لو اني انتقدت هالمنتج مو شرط تطبقين كلامي ممكن ماينفع لي ينفع لك ابداً لاتاخذون بكلام احد فقط انا اقول وانتي ابحثي عن هالمنتج شوفي التقييمات عليه .. مافي حاجه كامله لذلك كل شي بحطه راح اقولكم اذا هو فادني او لا بعطيكم تقييمي عليه وسعره هل هو يستاهل او لا صوره للمنتج وبالاخير هل استخدمه مره ثانيه واعيد التجربه او لا ؟ اتمنى دعمكم لي عشان اتحمس انزل وشكراً لكم 💕